لماذا الخوف !! لماذا الصمت!!

[حنين عراقيه]

بسم الله الرحمن الرحيم


السلام عليكم



حبيت اليوم اننو اطرح عليكم ظاهره موجوده منذ سنين طووووووووويله و الحد الان

بمجتمعاتنه الشرقيه و احتمال تبقه اليوم القيامه

و هيه الخوف من مصارحة الاهل بمشاعرنه الحقيقيه

اعتقد قلما يوجد شاب او شابه تكدر بكل جرائه و ثقه تصارح اهلهه

بمشاعرهه اتجاه اى شخص

حتي لو الاهل كانو متفتحين لدرجه كبيره مراح يتقبلون هلمسئله

يعني من الصعب انو بنت اوولد لمن يحسون بمشاعر حب اتجاه الطرف الثاني

يرحون و يكولون لاهلهم هلشغله
لانو غالبا

اعترافهم هذا تتكون عليه نتائج همه بالغني عنهه

يعني مثلا لو البنت كالت احب فلان شاب لاهله مع انو هيه اصلا ممبينه هلشي حتي

للشاب نفسه

الله الاعلم اهلهه شيسوون بيه

اكو اهالي يمنعون بناتهم حتي من الهاب للمدرسه او الكليه لهذا السبب
و يقطعون البنيه عن العالم كله

و الولد ايضا لو صارح اهله بحبه لبنت احتمال اهله يكطعون المصروف عليه او يهددو بطرده من البيت




و في هذا الزمن لانو النت اصبح في متناول يد الجميع و انتشرت ظاهرة الحب علنت

حتي لو تكون صادقه لابعد حدود من غير الممكن انو الاهل يتقبلون فكرة

اننو بناتهم وولدهم تكون عدهم من هلعلاقات و لو عرفو بيهن

اكيد يمنعون الشابه او الشاب من استخدام النت

و هلحالات موجوده بمجتمعنه

و دائما نسمع عليهن
السؤال هو ليش الاهل هيجي يسوون

مو همه دائم يكولون لاولادهم تعالو صارحونه بكلشي حتي لو كتلتو واحد كولولنه

لتامنون بشخص غيرنه

لعد ليش لمن الشاب او الشابه يعترفولهم بمشاعرهم اتجاه شخص معين

يكلبون الدنيا

و يقيمون القيامه

و الاولاد من خوف العقاب

يضطرون يخفون علاقاتهم و بالتالي راح يفقدون الشخص اللي ممكن ينصحهم بصدق

و احيانا يوقعون بفخ اصدقاء السوء او المغرضين

ليش الاهل ميعترفون او ميتقبلون مشاعر الحب اللي تتكون بقلب

اولادهم

و في اغلب الاوقات يحاولون قمعهه


و السوال الثاني هل احنه لمن نكبر و نصير بموقع اهلنه


راح نتتبع نفس نهجهم

اوووووووووووووووووو

راح ننطيهم حق

اغلبنه انحرم منهه



حاولت بهل موضوع اسلط الضوء علي حاله يمكن اكثريتكم تمرون بيهه حاليا

او مارين بيهه سابقا



ياريت تفيدون بعض بارائكم و من خلال هلموضوع تقررون اننو في المستقبل يا نهج راح تتبعون مع اولادكم



رمضان كريم

ينعاد عليكم بخير و سلام :53: :53:

[المهندسه]

شكرا حبيبتي حنين على الموضوع والصراحه هو موجود فعلا للاسف
يعني اني شخصيا من زمان افكر بهذا الشيء مو على اهلي اقصد الي اشوفه واسمعه
ليش يمنعون ابنائهم ويعاقبوهم اذا صارحوهم بشيء يخصهم سواء كان عمل قامو ابي
او خطأ ارتكبوا او حتى حبو شخص
يعني ماعرف ماكو اي تفسير
احيانا يكولون من فرط خوفهم على الابناء
بس السؤال ليش متفكرون بعاقبه كثره الخوف عليهم وزجرهم وين يوصل بيهم
مثل منشوف ببعض المجتمعات والله الحافظ طبعا

وليش متكونون لابنائكم اصدقاء بدل ميكولون لغيركم يكولون الكم
غريب تصرف الاهل وماله تفسير

واني عن نفسي لو اكبر ويصير عندي اولاد(بالمستقبل البعيد ان شاء الله طبعا) ابد ما اتبع وياهم هيج طريقه بالعكس ادخل لقلوبهم واساعدهم00
وهذا الشيء اتعلمته من والدي الله يحفضه هو كلش قريب مني ومن خواتي

ودائما متفهم ويساعدنه كل شخص حسب مشكلته
وكذلك امي الغاليه الله يديمهه النا

بس لكل شيء حدود
اتمنى فكرتي وصلت الكم

تحياتي للجميع وبالاخص لحنين الورده هي ومواضيعها
اختكم المهندسه

[الاميرة]

حنونه مواضيعج روعه طبعا...

حبيبتي انا بالنسبه الي لمن اكبر اكيد راح امشي على نهج اهلي ..
بس انا اكول لازم يلاقون الاولاد من الاهل شدة وعصبيه ..حتى يحسون انو اكو احد وراهم ويخافون منه
وبالتالي يسيرون مسار صحيح..بس اكيد بعد منتوبخه ... وبعد ميهدوون راح يصير نقااش بين الاهل والابناء ..وراح يتوصلون لنتيجه.. بعد النقااش ويسمعون اراء بعض ويوجهوون الاهل النصائح وفضت الشغله ..انشاء الله راح يصير خير ..بس اني اشجع ..انو لازم نصارح الاهل بالي نشعر بيه..تجاااه اي احد لان اكيد همه اكبر منه والهم خبرة ..وراح يراونه طريقنه الصحيح ..وبعدين كل شي بالاخير مسيرة يبااان ومراح يبقه شي متخبي...فا الصراحه راااحه كلش..

[ريتاج]

عااااشت ايدج حبيبتي حنونه على الموضوع وطرحك للمشكله بهذا الوقت فعلا هذي مشكله واعتقد اسبابها هو مجتمعنا المتقيد بعادات وتقاليد متغيرت رغم تغير الوقت صحيح هذي العادات والتقاليد تمشي بامور لكن بامور ثانيه مراح اتحلها واتزيد الحطب على النار خصوصا بهل المشكله اني اعرف اهوايه بنات بعد حتى طلعه من البيت ميطلعون بسب صراحتهم وجراتهم واعتقد الحل الوحيد لهذي المشكله او نقدر انسميه علاج مؤقت هو السكوت والابتعاد عن كلشي بدنيا والانطواء على نفسنا <هيج يردنه مجتمعنا انكون> لان كلام الناس ميرحم خصوصا للبنيه ...
اتمنى انو وصلت فكرتي الج
وتقبلي تحياتي

[ابقى الوفي]

شكرا جزيلا على الموضوع
بنسبه لطرح الموضوع
واولا المفروض ان لا نناقض الدين وما يوصي به القران
2 لو لم يكن هذا التشدد لاصبح الشذوذ ضاهره حضارية في المجتمعات العربيه
3 لاصبح التمرد والتفكك في العوائل الى حد نعوذ بالله وياكم لاى حد لا يعقل عقباه والكثير الكثير
فاكتفي بهذا وشكرا جزيلا على الموضوع تقبلو اسما تحياتي
http://www.9m.com/upload/23-9-2006/0.9169201158.jpg

[Rogiere]

شوفي حنين الشخص من يخاف من شي ويقدر يكوله اذا هو يعرف الي سواه غلط او بي خطء من اي ناحيه اتكون واذا كان الشي الي سوا صحيح مو مشكله يذكره اني بالنسبه اليه صريح يعني مثلا اذا واحد حب
ابنيه ويعرف البنيه خوش بنيه وبنت ناس وسمعته نضيفه ما بيه شي يصارح اهله واذا هو يعرف البنيه بيه
خلل ويخاف يكول لهله يعني البنيه بيه غلط اعتيادي اهله راح يرفضون لمصلحته وان شاء الله ماكو داعي للخوف لازم يصارح الشخص اي شخص مقابيله واذا يظل هيج مراح يعرف يعيش حياته واني اعتبره
ضعيف الشخصيه


تحياتي
دمعة المقهور

[بنت بغداد]

موضوع جميل

بالنسبة الي ...

وهذه هي وجهه نظري ...

وهو انه من الممكن للشابة ان تلمح لاهلها وخاصة امها عن اعجابها بشخص معين ...

واذا شافت الام انه الولد زين واخلاقه ومواصفاته زينة فاكيد راح تشجعها لبنتها واذا لا اكيد راح توضح وجهه نظرها ...

طبعاً هذه الحالة اذا كانت الام بمثابة صديقة لبنتها وليس هناك اي حواجز بينهم ...

وبالنسبة للشاب فمن الممكن وبكل سهولة ان يصرح عن الفتاة التي يردها ...

وهنا موقفه يختلف عن البنية لان يكون في موقف اقوى فاكيد اذا البنية زينة واخلاقها زينة اكيد الاهل ما عدهم مانع طبعا هذا فيما اذا ما كانوا خالين بنية معينة براسهم يردون يزوجون ابنهم الها ....

وطبعا الرفض من قبل الاهل مثل ما نشوف الها عواقب وخيمة وهو انه من الممكن ان البنية تهرب مع الشاب او العكس ...

واكيد من نكبر رغم التطور ورغم كل شئ الا اننا نبقى على تقاليدنا الاسلامية ...

ولكن بدون اصرار وبدون تطرف لان الحب سوف يرسم لطريق كل فتاة وكل شاب ...

شكرا على الموضوع حنونة

[سمر العراقيه]

والله شكولج حن حن بس اني بصراحه ماماره بهيج تجربه بس صديقتي من كنا بلكليه ماره بهيج تجربه حبه ولد وحبته وظلت علاقتهم اربع سنوات ومن تخرجوو راح يخطبهاا من اهلهاا مقبلو ينطوهاا اله وهمه واحد يحب الاخ بس بعد الاهل يبقون اهم شي نصحناهاا وكنالهاا كلي لاهلج انج تعرفيه من زمان مقبلت تخااف من اهلهااا وهوو الولد مياس ظل يخطبهاا مره ومرتين وثلاثه حتى توسط والاهل معاندين ومقابلين تعرفين التحقيق شلون عرفتيه جنتي تحجين وياه وهااي الامور ونحرم واحد من الثاني وهسه هوو حتى بلعراق مبقى طلع خارج العراق
بس احنه ماكو بيدنا شي حن حن غير همه اولياء امرنه واكبر منه ويعرفون مستقبلنه
شكرا حن حن وتحياتي لكي

[احمد محمود]

روووووووووووووووووووووووعة يا حنين مشكووووووووووور

[حنين عراقيه]

شكراااااااااا لمروركم جميعا

اني اتصور اننو حتي لو مموافقين علي نهج الاهل في هذا الزمان لمن نكبر راح نتبع نفس اسلوبهم

لان هاي شي مغروس بداخلنه من زمان

بس هلطبيعه مو صحيحه

انفتاح الاهل مو معناته اننو يتركون مطلق الحريه لابنائهم لا بس علاقل

يسمعون حجي قلب الابناء و اعترافهم بحبهم لشخص معين

علمود يكدرون يوجهوهم صح

اللي اتمني اننو اباء و امهات المستقبل

يكدرون يتحملون سماع صوت قلب اولادهم و اقصد

صوت مشاعر اولادهم



اني شخصيا مماره بهل تجربه و اهلي كلش متفتحين و يسمعولنه بكلشي

و كالولي فد يوم اذا احد عجبني قبل اىىىىى شي اكول الهم



بس ماادري اذاا فد يوم مريت بهل حاله شنو راح يكون ردة فعلهم

اعتقدد احنه همينه علينه مسئوليه و لازم نعرف بيا اسلوب نحجي ويا اهلنه و اختيارنه يكون صح


بس يبقه بقلب كل واحد الخوف من قمع مشاعره

اتمني اكون ساعدت اى شخص يعاني من هلمشكله

ولو بكلمه وحده

رمضان كريم يا احبائي

[بنت بغداد]

انفتاح الاهل مو معناته اننو يتركون مطلق الحريه لابنائهم لا بس علاقل

يسمعون حجي قلب الابناء و اعترافهم بحبهم لشخص معين

شوفي حنين ماكو اكثر من الاهل يخافون على اولادهم سواء كانوا بنات او ولد

واكيد كل عائلة تفرح من تشوف بنتهم او ابنهم عايش حياة سعيدة

ولكن الاهل يكونون اكثر خبرة بالحياة فأكيد يعرفون شنو الصح او الخطأ

اكثر من ابنائهم

لان في حالة الشعور بالحب

لا نفكر بالعقل بينما نجعل القلب هو الحكم

وهذا هو الخطأ

[الشـــــــــــاعره]

السلام عليكم اخت حنين تسلمين على هذا الموضوع الرائع مثل الي كتبه

والله الصراحه الاهل مرات يكونون على حق من ميقبلون بتهم اتحب وواحد وتصير علاقه ومن هلشي لان ولد الحرام هوايه

لاكن مو مفروض ابد يستعملووون العنف وياهم مثل الضرب وهكذا


بلعكس اذا الاولاد محيصارحون اهلهم لعد المن يتجهون ويطلبون النصيحه
بس اخت حنين انتي طرحتي مساله معقده وابد مو مرغوبه في المجتمع الشرقي اما بالنسبه للسؤال الثاني الصراحه ما اعرف اشلون راح اتصرف لان اني مو ام وما اعرف اشلون الاهل يفكرون بس انشاء الله اكون متفاهمه واكدر افهم الاولاد بس الي متاكده منه تنو ابد ما استعل عنف لان اني متربيت على هيج

وعاشت الايادي اخت حنين
وتقبلي مني ارق التحيات

[ميس الحب]

هلو عزيزتي حنين
الموضوع جدا مهم
اني بنظري لازم على البنت ان تحجي لواحد من الاهل على الاقل وخاصه الام بأعتبارها اقرب للفتاة
اذا هي صدق اتخاف على نفسها
:53:

[عاشق الزهور]

السلام عليكم
حنين الموضوع رائع اذا امكن اعلق عليه لكن من وجهة نظري..
حنين هيج مواضيع تحتاج للتفصيل .. عدنا اساسيات نعتمد عليه في تحليل هذا الامر من جانب اجتماعي ونفسي وطبي بنفس الوقت بس اريد منك انك تقرئي مو فقط الاسطر لا بل ما بين الاسطر وهو المهم حنين

خلي ناخذ القضيه من فرعين.
اولا/ان كان الابوين اساس تربيتهم على الصدق والصراحه فهذا مسام به انو الطبيعه هذي تنتقل الى طفلهم وحتى لو كان تطبع ايضا فيه وجهة نظر وان كان من احد الطرفين من كثرة التعامل والعشره ما بينهم يتطبعون على الصراحه والجرائه مع بعض وهذا التطبع ينتقل الى مرحله طبع ومثل ما تعرفين حنين انو انتقال الطبع الي هو من الافعال الظاهريه لخلايا العقل الباطني الى طبع في خلايا العقل الباطني وخلايا العقل الباطني تستمد تغذيتها من الدم فينتقل هذا الطبع او من خلال عامل(rh) الوراثي الى الطفل
فيحمل صفات الاب والام من هذا الجانب
فراح ايكون صريحه وجريئ معهم واكيد لانو اساسهم الصراحه والجرائه فراح ايكون هناك حل للمسئله هذي نقطه.

ثانيا/ اما اذا كان الاب والام يحملان عكس ما ذكرنا في النقطه الاولى ايضا هناك حل وهو المجتمع وتاثيره الايجابي احيانا في تعزيز الثقه عند الطفل حتى وان كبر بعد حين الصراحه والجرائه ما تعتمد اعتماد كلي على العمر احيانا حنين.

الاسباب حنين ممكن انك تستنتجيها من ما بين الاسطر حتى لا يتبادر لذهنك انو عدم ذكر الاسباب.

المعالاجات ان لم تتم من البيت فاكيد الخروج الى المجتمع وتكوينت الطفل راح تعتمد على هذا الامر.

اما مسئلة انو لو كبرنا هل راح ننهج نهج ابائنا؟ حنين هذا لا مناص منه اكيد من راح اتكون عندك اطفال راح تشعرين بهذا الشعور والخوف والمتكرر والدائم احيانا وحقهم وحقك على اولادك ايضا هذا الامر
ولا تنسين انو العرف الاجتماعي له دور غير مسبوق في هذا الخوف للوالدين على ابنائهم مهما كانت طبيعتهم
اما مسئلة القبول او الرفض من الابوين لهيك مسئلة فلاحتماليه العظمى هي الرفض حنين وهذا واقع حال المجتمع العراقي خصوصا يرفض او احيانا يتحفظ على هذي المسائل

تقبلي تحيات اخوج واتمنى انك تقرئين الرد . واكرر هذي وجهة نظري من خلال استقراء الواقع
شكراا على موضوعك الرائع

[حنين عراقيه]

ردود اكثر من رائعه و فعلاااااااااااااااا اتوضح الكثير من الامور اللي احنه متجاهليهه


قريت كل رد بتمعن شديد كلش استفاديت من وجهة نظر كل واحد من عدكم

اسعدتني ردودكم جداااااااا

اكثر من ما تتصورون لانو المسئله هاي من واقع حياتنه و لازم نناقشهه علمود نطلع بفائده

رمضان كريم

[شذى الورد]

مرحبا حنون حبيبتي
اولا موضوع كلش عجبني ومن زمان في بالي هاي الاسئله لو كبرنا نصير مثل اهلنا في تصرفاتهم
اني مراح اعلق كثيير لان ماشاء الله الشباب مظل شئ ما حجوه وكله صحيح
احنا من قبل مايصير عندنا اولاد يكون تفكيرنا جدا نظري بس بعدين الواقع يغير كثير قرارات بحياتنا ......... بس اني عن نفسي كنت اتمنى لو تكون عندي بنت حتى اربيها بالطريقه الي اتوقع تكون مثاليه والباقي على الله اهم شئ هو ان اكون قريبه جدا منها واسمع كلشي منها حتى لو كان في شئ خطا احاول ان ما اكون متعصبه كدامها حتى تأمن بيه وتحجيلي كلشي وبهيج اكون اني عرفت كل افكارها وتصرفاتها ومن خلال اسلوب ذكي احاول اوجها للي اشوفه صح واهم شئ اقنعها بوجه نظري واني متاكده لو البنت لكت الصدر الي يسمعها بكل حنيه وهدوء ما اظن توكع بالغلط الي نخاف منه وهمين ماعندي مانع تكولي عن شخص معين واخليه يعرف اني اعرف عن علاقته ببنتي حتى لايفكر انها صيد سهل صح ولازم يدخل البيوت من ابوابها هذا تفكيري
بس ماصارت عندي بنت شفتي حنون شلون قهر

[المهندسه]

شذى الورد الصراحه بعد اذن حنين يعني ردج عجبني رأيج هو فعلا الي ردت اكوله
وماعرف بردي يمكن موصلت فكرتي

يعني احنا منحجي على الاهل همه الهم الحق يخافون على الاولاد ويشدون عليهم وخاصه بهذا الزمن الصعب
الي يحتاج الشده بالتعامل للمقدره على السيطره
بس ؟؟
مو كلشي عنف يعني الرفق واللين وطريقه الحوار والتعامل هذا الي نقصده وهذا الي للاسف بدأ
ينفقد ببعض الاسر الان

يعني نتبع اسلوب الحوار الذكي مثل متفضلتي للوصول الى مايدور في عقولهم
وقلوبهم حتى نستطيع التصرف لان التفاهم افضل شيء
لان القسوه والخوف الزايد الي مو بمحله احيانا يأدي بالاطفال
او نقصد الاولاد الى طرق غير جيده
احنا في غنى عنها

اسفه على الاطاله بس الموضوع حلو وبيه مجال نقاش واسع
وحبيت اكرر ردي من بعد اذن حنونه الورده
تحياتي
للجميع اختكم المهندسه

[حنين عراقيه]

متتصورووووووووووون شكدفرحتي افكاركم ووجهات نظركم البنائه و الهادفه

و كررتهه قبل و هسه هم اكولهه

كلش استفاديت من وجهات نظركممممم

و انشالله الكل يستفادون منهه

من من حياتي لو مليون مره رديتي هلشي يشرفني ولله



تسلمولي يااااااااا احبائي


رمضان كريم

[FALCON]

اختي الغاليه حنونه..

بلا شك ان الموضوع غايه في الاهميه والتميز ولكنني اريد ان ابدي رايي فيه بكل صراحه ان السبب لاساسي من عدم مصارحة الشاب او الشابه لاهله اذا غرم او غرمت بشخص ما ليست التقاليد او العادات المتوارثه وانما باعتقادي هي الشك وعدم الثقه من ان هذه العلاقه ستستمر طويلا اوقد تنجح ولذلك يبادر الشخص باخفاء مشاعره وعدم بثها الى اقرب الناس اليه بسبب ان هذه العلاقه لازالت فتية وقد يحكم عليها بالفشل في اية لحظه الى ان تسنح الفرصه الى ان يتاكد من انها نضجت وان لها ان تظهر الى الوجود وعندها وكمجتمع اسلامي او عربي متزمت لا نقبل على انفسنا من تتواصل العلاقه بدون ان يكون لها غطاءا شرعيا يجعلها بالمستوى الذي يقبله المجتمع الا وهو الزواج اذ ما الفائده من ان تذهب الفتاة الى اهلها وتقول لهم بانها مرتبطه بشاب دون ان تتاكد من انه سيقوم بخطبتها حتما.........

شكرا وتقبلي خالص تحياتي واعجابي بالمواضيع الشيقه والمفيده في نفس الوقت
http://www.9m.com/upload/29-9-2006/04932011595372.gif

[الزعفراني]

مشكور اخوية على موضوعك الراقي

[bhaa0x]

ليس من الصعب ان تضحي من اجل الصديق
بل من الصعب ان تجد الصديق الذي ستضحي من اجله

[bhaa0x]

ولكن

[bhaa0x]

اصرخ بجه اللي يظلم اصرخ بوجه اليخون

[شيطان الهوى]

عزيزتي
اعتقد ان في هذا النوع من العلاقات بالتحديد واعني مسألة العلاقة العاطفية يجب ان ينظر اليها من عدة زوايا وهي:
1- ما هو مصير هذه العلاقة بالنسبة للبنت اولا وللشاب ثانيا لان في كثير ان لم اقل معظم مثل هكذا علاقة مصيرها الذبح اذا ما طلبت البنت من الشاب التقدم لخطبتها .
2- ان هذه العلاقة يجب ان تكون مبنية على اسس الدين ، كيف .......؟؟؟؟
اعني ان لا تحدث بينهما لقاءات منفردة حتى وان كانت في اماكن عامة لأن هذا باب من ابواب الشيطان ، اما مسئلة الانسجام الذهني الذي يجب ان يتوفر في الشخصيين فان فترة الخطوبة هي كافية لقياس ذلك.
3- اذا كانت هذه العلاقة صحيحة ومبنية على اسس متينة وصادقة المشاعر يتقدم الشاب لخظبة هذه الفتاة وبالتالي فان البنت لا تكون ضحية في النهاية او فريسة لهذا الشاب .
3- نحن اناس شريقيين لنا ديننا وعادتنا وتقاليدنا واعتقد ان كل هذه الامور لا تتقاطع مع الحب اذا كان شريفة عفيفة ابدا بل تبلوره في علاقة انسانية يملئهى الحب والحنان والسكينة ، قال تعالى ( وخلقنا لكم من انفسكم ازواجا لتسكونوا اليها وجعل بينكم مودة ورحمة) وهذا اعظم وصف لإي نوع من انواع العلاقات العاطفية .
لذا ارى ان الحذر احيانا مطلوب كي نحمي شبابنا من الوقوع في شِرك الشيطان ومصائده والتقيد دائما [لا التحرر الاجوف الخالي من كل معنى من معاني الانسانية والرامي الشاب الى مزبلة الوضاعة والانحلال الخلقي] اراه في مثل هذا النوع من العلاقات هو مطلوب عند الاهل صيانة لبناتهم من الذئاب المفترسة المنتهزة لأي فرصة كي تنقض على فريستها وعند ذاك ........
ولات ساعة مندم

[داايخ]

والله ما اعرف شكلكم العالم بيا حال وانتو بيا حال لكم يا حب صامت عمي صارت علني السالفه الام تدري بعلاقات بنته وهي تساعده والاخوات يدرن وهن هم عدهن والاخوان مغلسين والاباء ملهم علاقه والعب ابو سعود العب هذا حجي الخوف صار قديم والولد كامو يحبون بنات حابه 20 مره قبله عادي مله علاقه بماضيه البنيه عمي الدنيا انكلبت وما ظلت زلم خشنه:36_1_6[1]

[سأبقى ماسة]

شكرا حنونة عالموضوع المهم والحساس بصراحة اني من الناس اذا راح احب فد يوم راح اخاف اكول لأهلي بالرغم من انه اخواني من حبوا اجوي وكالو لاهلي واهلي راح وخطبولهم الي رادوهن اني ماأنكر ماما دائما تكول حبوا بس لتوكعون بالغلط لان مهما كان ملازم نحرمكم من شي من حقكم بيوم من الايام احنة عشناه بس طبعا مستحيل اني اكول لماما اني احب فلان وادري اني انه هي مراح تعارض وراح تنصحني بس ماما تريد تكون النهاية انه انجمع بهذا الشخص مو اتونس وياه يوم يومين ويكنسلني يعني تريده حب طاهربس اني حتلو حبيت واحد وخطبني اكيد مراح اكول لاهلي اني كنت احبه لان اهلي منطيني والحمد لله حرية الاختيار يعني مراح يدققون وراية من اوافق على شخص معين وانما مدام عاجبني خلص هذا مصيري
تقبلو مروري

[~الاسد ^العراقي~]

موضوع رائع وبالغ الاهمية
بالنسبة للاهالي ايسون هيج خوفا علينا احنة لين اذا انطونة حريتنة التامة راح نوكَع بالخطأ
وبالعكس هذة الشي صح من قبل الاهالي لكي يحافضون على اولادهم وبناتهم لكن الشي الخطا هو المعاملة السيئة هية الي اتخرب علاقة الاهل باولادهم وبناتهم وتمنعهم من المصارحة ولكن لو الاهل اتبعو اسلوب لين في معاملة ابنائهم لكانت النتيجة ايجابية
ولكن هذة الشي يكون حلم رائع بالنسبة للولد او البنت ولكن لا يريدون احد ان يعكر عليهم الحلم وعندما يتحول الحلم الى كابوس
يحاولون ايجاد من يساعدهم فلا يجد الولد او البنت سوى الاعتراف لاي احد غير الاهالي وأن اخفى هذة عن الاهالي سيسبب مشاكل و هم في غنة عنها ولكن اول وتالي الاهل راح يعرفون بهاي العلاقة ولو الاهالي حلو الموضوع بطريقة ليست بالقوة فبالقوة والقسوة سيكبر الخطا ويزيداد اثره
ويتخيل الابناء ان الكل ضدهم اما اذا استعمل الاهل الاسلوب الجيد كنصيحة او اخبار ابنائهم بان هذا خطأ او ما شابه
ذالك اذا يساعد على حل المشكلة حتى ولو لم ينفذ الابناء هذة النصائح ولكن سيكونو حذرين لانهم ميزو بين الصح والخطاأ
شكراا على الموضوع الرائع
يا حنونة
تحياتي
الاسد العراقي